眾所周知,退休人士為咗解決退休後生活嘅使費,單靠強積金(MPF)係唔夠㗎,所以按揭證券公司就喺2012年推出「安老按揭計劃」,即係坊間所講嘅「逆按揭」,專俾55歲或以上有樓揸手嘅長者,將佢哋自住嘅物業按俾銀行,然後每個月攞一筆錢作為生活費;所以,呢個計劃其實係適合有樓但手頭上cash唔夠嘅「老友記」。
一般嚟講,我哋買樓就同銀行借錢,跟手每個月供樓,呢啲就係「樓按」;而「逆按揭」就即係成件事反轉嚟玩,即係將手頭上已經供滿按揭嘅樓,反向按俾銀行,而銀行就會每個月向長者業主俾番一定數量嘅金額,所以就有「逆按揭」呢個名啦。
暫時嚟講,私樓、未補地價嘅居屋(即係綠表居屋)、夾屋及公屋都可以向銀行申請「逆按揭」。
另外,根據按揭證券公司要求,申請人必須持有香港身份證,而按俾銀行層樓嘅樓齡須為50年以下,申請人亦都可以揀10年/15年/20年嘅固定年期,又或者係終身每月收取年金,直到「逆按揭」到期為止,到時銀行就會收番層樓進行拍賣;而按比銀行層樓嘅估值就用市值再減地價之後計算。
以一個60歲單身退休人士為例,層樓每值100萬,呢位「老友記」每個月就可以攞到$2,000至3,700。
再舉多一個例子,同樣都係60歲單身退休人士,不過今次選擇10年年金年期,而佢層樓嘅估值係600萬,咁每月可以得到嘅年金就係$22,200元($3,700×6=$22,200)。
全文閱讀
資料來源:
MoneyHero