去柴灣漁灣邨，總不難遇見他。手推米白色垃圾桶改裝的戰車，上面寫着8個大字：洋服師傅，晚年創業。見你望多兩眼，乾脆從戰車掏出手寫名片：「衣服修補，遠近交收」。他說要不在家改衫，要不就在路上，「一陣先約咗個小姐喺地鐵站交收」。短褲拖鞋小白襪，心口一副紅框老花眼鏡，嘴角掛着和善微笑，一派悠然自得。師承已故洋服大王張活海，見證少年張國榮成長，他是83歲老裁縫馮榮欣。
馮伯的戰車很妙，後面掛着網球筒，放了一把花生；車旁掛了一把晴雨長傘，打開蓋子，剛好放得下一張紅色膠凳。「行得攰可以坐、肚餓有花生食，落雨都唔怕」，說時一面洋洋自得。網絡世界靠面書微博宣傳，老人家則穿梭街頭，馮榮欣靠一雙腳，還有他的戰車做生招牌。「派傳單，冇人肯接，推住架車，反而多人問」，他自謔牙擦過「食力簡」簡炳墀：「好多舖頭做一兩年就執笠，我唔使交租，幾條針線加部衣車，冇乜成本，生意唔好最多賺少啲。」
住柴灣送衫到天水圍
家住柴灣，他的家就是工場。客人由樓下保安員、茶餐廳收銀阿姐到中環OL，最遠送過衫去天水圍，記者問他不怕連車錢都蝕埋？「有老人優惠，坐巴士小巴，兩蚊雞之嘛」。改短褲腳收10元，複雜如改西裝袖，盛惠30元，只及市價三分一，仲包送上門。頂爛市，馮伯說志不在錢，只為圓創業夢，「3個仔結晒婚，養得起老竇有餘，佢哋叫我唔好做，但我話大半世幫人打工，晚年創業，收得平啲，幫人幫自己，有乜唔好？」
寫名片附詩句鼓勵人
退休數年，別人四出旅行享受生活，他卻大嘆無聊好空虛，「朝早飲茶，其他人打開份報紙喺度論政，拗到面左左，我寧願帶支筆去練吓寫字」。
他那用以派街坊的手寫名片，背後都附首打油詩，勵己勵人，「人生七十古來稀，今人八十不稀奇……飲餐茶，剛好可寫6張」。老來重操故業，他說是偶然，「有次貪得意，幫個護士改窄個褲頭，我隨口話收佢20蚊，結果佢畀100蚊話唔使找，讚我手工好」。那份欣賞，重燃他心中一團火。「以前幫人做衫，試過俾人話你啲二打六一定唔掂，老咗反而想試吓自己係咪仲有真功夫」，揚言「聽日死，今日都要做嘢」的馮老，拖着他的戰車笑着說。
資料來源：蘋果日報
